Kurz vor dem Wochenende gibt es ab sofort auf GRHeute ein paar Gedichte, Geschichten und Sonstiges von unserem Musikredaktor Chris Bluemoon. Stöbern, lesen, kopieren oder einfach auch nur geniessen. Heute das Stück: Miar gsehn üs wieder.

 

20 Jahr sind dur z Land zoga.
Lääk, wia isch dia Ziit verfloga.
I vergiss di ni, i denk an di.
Es zücht mi wieder zu diar hi.
Dia Ziit inera Nussschala blendet vo Media und Grossfirma.
Kalti Emotiona und doch so a hitzigs Klima.
Wia gära hätti di um Rot gfrogt,
uf dia Frog wo mi jetzt plogt.
Wia ma alles ertreit und sich vo Schatta befreit.
Dini Stimm no i mim Ohr, als wär’s geschter gsi.
Dis Gsicht in mina Tröim, es gaht nid verbi.
Du bisch denn eifach ganga.
Schad hemmer nid meh Ziit ka.
I in dena Seil ghanga, du nüma dah.
Ohni Zwiffel di Beschta müand viil z früah gah.
Du hesch a Loch hinterlah, wo ma nid usfülla ka.
I hoff du luagsch aba und bschützisch üs guat.
I vermissa di und läba wiiter, au wenn’s weh tuad.
Wenni vo diar reda, zauberets a Lacha uf mis Gsicht.
Kurz aber intensiv, du körsch zu minera Gschicht.

Miar gsehnd üs wieder. Irgendwo bi Gwitter oder Sunnaschii.
Bis denn läbi doppelt wiiter, wil d Sehnsucht noch diar gaht nid verbi.
I erkenna dis Gsicht in da Wolka und weiss du bisch immer an minera Siita.
Miar gsehnd üs wieder. Sind’s bis denn au schöni oder bitteri Ziita.

Di ganz Wält etz wia a Schiiterhuufa.
Er brennt, bis i vergässa z schnuufa.
I dörf nid vergässa, dass es schön isch, obwohl du nüma dah bisch.
Viili woni gliabt ha, sind hüt nüma dah.
Z Universum stellt Ufgaba, wo i nid lösa ka.
I laufa wiiter, suacha di in jedem schöna Moment.
Obwohl dä Zwiifel in miar immer no brennt.
Luag, wia viil Hass täglich wia Wasser flüsst.
I versuacha azkämpfa und han scho enttüscht.
Du bisch a Heilligi, wia du das verkraftet hesch.
Du hesch mi für immer prägt und zuguaterletscht.
I gib mr Müah nid panisch dr Notusgang z neh.
Au wenn d Sehnsucht gross isch, di wieder z gseh.
I luag zu mina Liabschta, büta am Chaos Gegastüür.
Lauf uf dina Spuura und gsehn z Läba wianes Abendtüür.
Vermiss di und vergessa di nia.
Au wenni ab und zua liaber wieder in mini Tröim fliah.