Kurz vor dem Wochenende gibt ab sofort auf GRHeute ein paar Gedichte, Geschichten und Sonstiges von unserem Musikredaktor Chris Bluemoon. Stöbern, lesen, kopieren oder einfach auch nur geniessen. Heute das Stück: Schlangafanga.

 

Er hed si sofort gseh, woner gspielt hed in dera fremda Stadt.
Si isch extra ko zum ihn gseh und vilicht dasses klappt.
Endlich z finda, was scho lang zämakört
Wil si sich an ihrem Fründ scho lang hed gstört.
Ihra Typ isch nia dah gsi und in dem Moment
Wär er eifach grad dr Richtig, wo si scho lang kennt.
Er hed sich Ziit gnoh für si, ihra tüüf in d Auga gluagt.
Ufzmal isch si wieder erwacht in ihm – dia Gluat.

Si hend denn no gschrieba, obwohl beidi vergeh gsi sind.
Er hed scho tröimt voma Huus, ama Garta und Kind.
Ei Monat spöter, beidi hend ihri Partner verlah.
Eigentlich sött am gmeinsama Glück nüt meh im Wäg stah.
Z Universum staht still, er wartet uf ihri Antwort.
Sekunda werdend zu Stunda, dr Wind treit alles fort.
Es isch es bitters Nei, wo ihm d Luft abschniidet.
Es sind dia Wort vo ihra, wo er dra verzwiiflet.

Klina Buab, du hesch viiles nid verstanda.
Liabi isch gföhrlich und kompliziert wia Schlanga fanga.
Es isch nüt, wo ma lernt ohni Narba z kriega.
Doch z Risiko lohnt sich jedes Mal sich z verliaba.

Drei Jahr spöter. Er trifft si zuafällig ir Stadt.
Es komischs Gfühl im Buuch und er isch grad wieder platt
Wil si so schön isch und er dia Chance hed vergeh.
Si frogt na wia’s ihm gaht und er seit ganz ok.
Ab jetzt suacht si ihn heim in siner Traumwelt.
Wenigschtens bliibt si döt bi ihm, wenn si in Echt fählt.
A paar Wucha spöter staht sin Nama uf dr zweit letschta Siita.
Näbem Foti vo ihm staht dr Text: Nia wieder liida
und

Klina Buab, du hesch viiles nid verstanda.
Liabi isch gföhrlich und kompliziert wia Schlanga fanga.
Es isch nüt, wo ma lernt ohni Narba z kriega.
Doch z Risiko lohnt sich jedes Mal sich z verliaba.