Khurer Schnitzelbankabend: Sprüche und Impressionen

Khurer Schnitzelbankabend: Sprüche und Impressionen

Juerg Kurath
01.03.2017

Am Montagabend fand an elf Standorten der traditionelle Khurer Schnitzelbankabend statt. Nachdem sich im vergangenen Jahr die Kultgruppe „Les Miserables“ von ihrem Publikum verabschiedet hatte, wurden an der diesjährigen Austragung auch noch die „Brambrüeler“ schmerzlich vermisst. Trotzdem erfreuten neun Gruppen und die Guggenmusik „Scarella“ die zahlreichen Besucher mit ihren Darbietungen. GRHeute war mittendrin und hat einige der coolsten Sprüche aufgelistet.

Schnitzelpunk

 

Dass Kunschthuus ufem Kunschthuus stoht, isch eigentlich scho rächt.

D’Verwächslig mitma Kachelofa wär jo würkli schlächt.

Doch dia wo mianggend wäg dr Sproch, das sind doch armi Tschütsch.

Ma gseht’s jo kuum, kas fasch nid läsa, nid amol uf Tütsch.

 

Sie händ dr Marti blitzt zwüsched Zizers und Khur Nord.

Z’Masans bim Kreisel träiter, fahrt uf Zizers zrugg sofort.

Vo döt us wieder zrugg uf Khur, är weiss halt wiamas macht.

Will dasmol passter uf, dass är au schön in d’Kamera lacht.

 

Kürzlich in dr Sauna händ miar philosophiart,

warum bald jeda Lümmel sina Pimmel kahl rasiart.

Miar händs glaub usagfunda, dia Antwort isch schnäll gä:

Dia Typa händ nid gärn, wenn d’Fraua Hoor händ uf da Zäh.

Schnitzelpunk

Schnudergoofa

 

Nen Nuggi brauch ich immer noch, mir muss man ds Füddlen putzen,

die Schnudernase läuft und läuft, kann ds Naastuch nicht benutzen.

Im Znüünitäschli, welch ein Puff hat’s zwanzig Pitschgi drin,

allpot werd ich verseckelt, weil ich so glappat bin.

Im Turnen bin ich gschtabig und hoch gumpen kann ich nicht,

das einzig, was ich super kann, ist schlooten, glaubsch es nicht!

Den gröschten Murks, den habe ich beim Hirnen mit den Zellen,

dafür kann ich das jetzt ganz ring auf Hauchdeutsch euch verzellen.

 

Miar sind nu drei kliini Würschtli, ohni Ahnig vo dr Welt,

„Schnudergoofa“ meint dr Lehrer, wenn er üüs vor d’Türa schtellt.

Aber immer an dr Fasnacht, zahlend miar das alles hei,

allna Nögg und Sesselfurzer – schiffend miar an d’s Bei!

 

Vor acht Johr händs ds Amerika dr erschti Schwarzi gwählt,

und jetz regiart an Orangscha: Das hät üüs grad no gfählt!

Miar froogend üüs schu, wia ma nu, sona Pfoschta wähla kann,

wo Sprüch klopft und nu Schämpis suuft ir Hair-Force Number one.

Vor drei Tag häts na undri tischt, a Virus ploggt na fescht,

dr Trump liggt mit knapp vierzig Grad und Schmerz am Glied im Näscht.

„No problem“, meint er, jetz wird halt vum Bett uus ds Land regiart,

dr Berlusconi heg das au fascht zwanzg Johr praktiziart.

Schnudergoofa

d’Wasserratta

 

D’Muater Natur – tuat üs schu viel beschera

tuat üs im Läba – über menggi Sach belehra

Jeda kriagt – was er verdiant natürli

So wia dr Trump – a affageils’s Frisürli.

 

Dr Beller will zur Irina ligga wia halt immer

stoht eina vur Securitas, bi ihna im Schlofzimmer

Dia tüan’s halt überall dötta stazioniara

wo’s mi’m Verkehr tuat nid so funktioniara!

 

As git jo Drohna – wo üs tüand überwacha

für mi kai Problem – do kann i drüber lacha

Bin i im Usgang – kumma hei uf all’na Viara

isch an dr Huustür, mini Drohna, am hyperventiliara!

 

Ob Bund, Kanton, Stadt wia au Gmeind

as wird plant, befohla, vor allem aber gmeint

Köpf und Idea hend’s, häsch z’Gfühl dia sind us Holz

kriagen kai Vogelgrippa denn au a Virus hät sin Stolz!

d’Wasserratta

 

Boccalini

 

Dr Bischoff Vitus nimmt im Bistum Chur us Altersgründa bald dr Huat

Er frogt jetzt no, ob Gott ihm a Stell im Himmel offeriara tuat.

Do maint dr Liabgott, dass das im Himmel nit so lauft

Dr offni Platz döt doba het scho dr Seppli Blatter kauft.

 

Sie – miar sind do letschthin im Europapark go Bahna fahra.

Für d’Fahrta mit Euro-Mir und Silverschtar hend miar tüchtig müassa zahla.

Hüt kriagsch du das Vergnüaga günschtiger und elegant.

Für zwei Schtutz zwanzig schlots di im Stadtbus umanand.

 

In letschter Ziit do tuat a huffa Negativs Schlagziila macha.

Dr Traum Olympia wird versenkt, s’isch nit zum Lacha.

Schtürgschenk für Firmä und Riichi das isch au verbi.

Positiv im letschta Johr sind nu Dopingtescht vo da Russa gsih.

 

D’Martullo-Blocher füahrt im Nazionalrot für d’Ems-Chemie a grossi Röhra.

Dass miar Bündnar iahra egal sind isch nit z’überhöra.

Miar Boccalini wüssand, Hoor uf da Zäh liegt bi da Fraua in dr Natur.

Bir Magdalena isch’s so heftig – jeda Zah hed an eigani Frisur.

Boccalini

Buccas Bletschas & Ils Quacs da Domat

 

D’Sommaruga möcht am Köppel d’Red nit vermiesa,

as tägi ihra leid sie müassi dringend go schiessa – dont worry, shit happens

Will dr Jogi Löw ar EM het in d’Hosa griffa, hend dia Dütscha,

z’Spiagelei vum Menü-Plan gschtricha – dont worry, chicken happy

Z’Nai zum Atomusschtieg het ziemli gsessa,

d’Doris Leuthard het grad a Iod-Tabletta gfressa – isch guat gsi, dia fahrt no i

Dia zwei Moslems us Basel hend kei Handschlag wella ge,

sit’s dia Szena Jogi Löw im Fernseh hend gseh – Sack stark, Sack stark

 

Dia Zita sind verbi – Wo d’Ösis do sind gsi

Sie händ Ems verloh – Nu d’Martullo isch no do

Ma het sich johrelang gschtritta – Und witer kho isch ma nitta

Z’ganza Areal a Schand – Bravo Gmeindsvorstand

 

Unser Retter ist da – nicht von Fern sondern von Nah

Für üs Emser Heilandstutz – usgrechnet vu Bonaduz

D’Emser sind herzlich und offa – aber Bonaduzer das het üs troffa

As tuat üs im Herza weh – Liaber hettamer Zigüner gseh

 

Witsch ussa finda ob da Summer schöön wird.

Für dä Zürcher Bruuch gäbts eina dä isch nit ganz dicht.

Wür da meischta Lüt vur Welt grad au no gfalla.

Wenn da Kopf vum Trump anstell vum Böök wür knalla!

Buccas e Quacs

Schmiarläppa

 

Medizinisch und chirurgisch kasch am Compi alles lärna.

Bei und Arma amputiera und dä Blinddarm entfärna.

Än Fähler isch miar glich passiert, nit so huara tschent.

Mis Arschloch isch z’Amerika jetzt plötzlich Präsident!

Schmiarlaeppa

Nepomuk

 

As schletzt mi füra und denn an d’Wand

zwei Rippa brocha und no d’Hand.

As haut mi uf a Sack das isch Äkschen pur

so na Fahrt mitam Bus vu Khur.

 

Dä Michi Bond dä schnorrt und schnorrt

dä schnorrt und schnorrt in einem fort.

Um besser werda muass er wenig tua

heb doch eifach d’Schnorra zua!

 

Dr Trump a Sexischt und Populischt

d’Meiniga zu ihm sind zimli gmischt.

I mag en – machen doch kei Stress

hät dr glichi Coifför wia da Gilbert Gress.

 

Strahlends Wetter as isch a Pracht

St. Moritz hät d’WM gmacht.

Für üs häts Medallia gschneit

und öppa isch a Kamera vum Himmel kheit.

 

Dä Tschugger isch a wohra Held

wird zumana Ehestrittli bstellt.

Er löst das suverän – jetzt muasch losa

schüsst an Boda und schisst daby in d’Hosa!

 

Nepomuk

Pizokel Kligga

 

Letschthin bin i z’Fuass vo Trimmis richtig Chur

Entgäga kunnt a Velofahrer uf dr glicha Spur

Dä kunnt mit grossem Tempo i tenka so a scheiss

Das isch das letschta wo i vo dera Welt noch weiss

A schnälli Stross wird jetzta baut, für d’Raser ideal

Vor allem freua tüand sich d’Ärzt, dunna im Krüz Spital

 

Am Gotthard händ miar Schwizer kriagt für d’SBB a neui Röhra

In Sacha Tunnelbau tüand miar zur Spitza köra

Jetzt wird a zweiti Röhra baut, do sind miar scho a bitzli Fan

Doch dunna in Bern sind schins verschwunda Tunnel-Plän

Das Verschwinda vo da Plän hät z’tua mim Trump und sinra Mura

Mit dänna Plän bauends in Mexiko scho Tunnel una dura

 

Uf am Platz vor am Theater tuan i Putschautöla gnüssa

Doch am Churerfescht tüens jetzt dä Platz ganz schlüssa

Uf dem Platz isch Fahrverbot das müand iar Liaba scho begrifa

Doch dr Marti Urs dä hät a Alternativa

Z’Putschauto feelin könn ma glich erläba, sisch nu nit zum Lacha

Ma muass nu mit am nöchschta Bus vo Chur a Stadtrundfahrt go macha

 

Eigentlich wäre das schon recht

Die Magd die treibt es mit dem Knecht

Erreicht er nicht die Mindestdauer

So treibt sie’s halt noch mit dem Bauer

Pizokel Kligga

Plättlirutscher

 

Dr Gion Gieri fahrt uf Khur in da Stau

bremsa fahra, bremsa fahra, do bruchsch Geduld sait ihm d’Frau

warta und warta, er isch schu ganz frustriert

Gion Gieri du söttsch fahra, z’Auto vorna isch parkiert

 

Dr Remo tuat sis Läba gnüssa

luagt nid um loht d’Rappa flüssa

vu Türm und Geld am prahla

söll gschider sini Schulda zahla

 

Schaida isch tüür das waiss jedes Kind

bald jedi zweiti Ehe do langsch dr an Grind

hürota das kann üs nid passiara

miar lön üs doch nid vur Alta kommandiara

Plaettlirutscher

 

(Bilder: GRHeute)

author

Juerg Kurath

Redaktor Sport
Langjähriger Berichterstatter des Bündner Sports, der BZ und der SO. Aktiver, Trainer und Funktionär in Leichtathletik, Triathlon, Biken, Volleyball, Fussball, Korbball, Handball, Casting und Bob.